Dy protokolle janë nënshkruar këtë të hënë në Shkup si pjesë e nismës Ballkani i Hapur, të cilat do të mundësojnë krijimin e një tregu të lirë të punës për vendet e Ballkanit të Hapur, në Serbi, në Maqedoninë e Veriut dhe Shqipëri.
Në një konferencë për medie në Shkup, presidenti i Serbisë, Aleksandër Vuçiq, ka thënë se këto protokolle do të mundësojnë që më një mars të hyjë në fuqi tregu plotësisht i lirë i punës për vendet e “Ballkanit të Hapur”.
“Kemi pasur disa gjëra të rëndësishme, gjithmonë ka detaje të pakëndshme, por s’dua të flas për këtë. E kemi pritur me muaj të tërë, dhe më 1 mars më në fund duhet të hyjë në fuqi tregu krejtësisht i lirë i punës në vendet e ‘Ballkanit të Hapur’ – Serbi, Maqedoni e Veriut e Shqipëri. Është lajm i madh dhe i rëndësishëm”, tha Vuçiq, raportohet në medie.
Ndryshe, liderët e vendeve të Ballkanit Perëndimor kanë shprehur gatishmëri për t’i zhvilluar vendet e tyre sipas standardeve evropiane për një qëllim të caktuar – anëtarësimin në Bashkimin Evropian.
Kështu është thënë në deklaratën e miratuar në fund të konferencës “Plani i rritjes së Ballkanit Perëndimor dhe integrimi më i shpejtë në BE”, që është mbajtur të hënën në Shkup të Maqedonisë Veriut.
Përgjatë konferencës, liderët janë paralajmëruar që nuk do të mund t’i vendosin njëri-tjetrit veto përgjatë procesit, dhe nëse ka tendenca të tilla, do të ndëshkohen.
Plani i BE-së për Ballkanin Perëndimor synon rritjen ekonomike të rajonit, përshpejtimin e reformave të duhura, dhe kryerjen e investimeve, që mund të avancojnë procesin e zgjerimit të BE-së me këto vende.
Vlera e ndarë nga BE-ja për këtë plan, për periudhën 2024-2027, është 6 miliardë euro.