Administrata Tatimore e Kosovës ka njoftuar se nga 1 qershori 2026 nuk do të lejohen pagesat me para të gatshme mbi shumën 2,000 euro në transaksionet me individë.
Sipas njoftimit të ATK-së, të gjitha pagesat që tejkalojnë këtë shumë duhet të realizohen përmes sistemit bankar ose formave të tjera elektronike të pagesës.
ATK u ka bërë thirrje qytetarëve dhe bizneseve që të respektojnë kufizimin e përcaktuar me ligj dhe të shmangin pagesat cash mbi limitin e lejuar, në mënyrë që të evitohen gjobat dhe ndëshkimet e tjera.
“Mos paguani cash mbi limitin e lejuar. Veproni sipas ligjit”, thuhet në njoftimin e ATK-së.
Ky vendim synon rritjen e transparencës financiare dhe luftimin e ekonomisë joformale në Kosovë.