Ministria e Arsimit dhe Shkencës ka miratuar Katalogun Zyrtar të Teksteve Shkollore dhe ka ekzekutuar mjetet për subvencionimin e teksteve shkollore për nxënësit e klasave 1–9 për vitin shkollor 2026/2027.
Sipas njoftimit të MASh, mjetet janë transferuar në llogaritë bankare të prindërve dhe kujdestarëve ligjorë përfitues.
Procesi i aplikimit për subvencionim ka nisur më 27 korrik përmes platformës eKosova. Aplikimet janë verifikuar fillimisht nga koordinatorët e autorizuar në shkolla, ndërsa listat e verifikuara i janë nënshtruar më pas verifikimit përfundimtar nga komisioni përkatës i Ministrisë së Arsimit.
Pas përfundimit të këtij procesi, lista e përfituesve i është dërguar Ministrisë së Financave për realizimin e pagesave.
Ndërkohë, MASh ka zhvilluar negociata me shtëpitë botuese për përcaktimin e çmimeve finale të teksteve shkollore. Në bazë të rezultateve të negociatave, Ministria ka miratuar katalogun zyrtar, ku përcaktohen çmimet e shitjes për secilin tekst.
Vlera e subvencionimit për tekstet shkollore në gjuhën shqipe, sipas klasave, është:
- Klasat 1 dhe 2 – 60 euro;
- Klasa 3 – 65 euro;
- Klasa 4 – 70 euro;
- Klasa 5 – 80 euro;
- Klasat 6 dhe 7 – 90 euro;
- Klasat 8 dhe 9 – 100 euro.
Me miratimin e katalogut, prindërit mund të blejnë tekstet shkollore sipas çmimeve të përcaktuara.
Ndërkaq, sistemi i aplikimit në eKosova mbetet i hapur për fëmijët që ende nuk janë regjistruar në klasën e parë dhe që pritet të regjistrohen në afatin e dytë.
Aplikimi mbetet i hapur edhe për prindërit ose kujdestarët ligjorë të nxënësve të niveleve të tjera, të cilët për arsye të ndryshme nuk kanë aplikuar ende për subvencionimin e teksteve dhe materialeve shkollore.