Kosova është vetëm një fitore larg kualifikimit historik në Kupën e Botës 2026, pasi eliminoi Sllovakinë me rezultat spektakolar 4:3 në Bratislavë, në gjysmëfinalen e “play-off”-it.
Në një ndeshje dramatike me përmbysje, “Dardanët” treguan karakter të jashtëzakonshëm duke rikthyer rezultatin dhe duke siguruar finalen vendimtare ndaj Turqisë.
Ndeshja nisi keq për Kosovën, e cila pranoi gol që në minutën e 6-të nga Martin Valjent. Megjithatë, reagimi erdhi shpejt, Veldin Hoxha barazoi në minutën e 21-të me një goditje të bukur nga distanca.
Sllovakia riktheu epërsinë në fund të pjesës së parë me Lukas Haraslin, por pjesa e dytë i takoi plotësisht Kosovës.
Fillimisht, Fisnik Asllani barazoi me kokë, përpara se Florent Muslija të realizonte një supergol nga goditja e lirë për epërsinë e parë të Kosovës. Dominimi u vulos nga Kreshnik Hajrizi, i cili shënoi për 4:2, ndërsa goli i vonë i David Strelec nuk mjaftoi për vendasit.
Tani, Kosova do ta presë Turqinë në stadiumin “Fadil Vokrri” në Prishtinë, në një finale që vendos gjithçka.
Një fitore do të nënkuptonte kualifikimin e parë në histori në një Kupë Bote.
Ky sukses i mundshëm vjen në një moment simbolik, në 10-vjetorin e pranimit të Kosovës në FIFA, duke e bërë edhe më të veçantë rrugëtimin e “Dardanëve”.