Nga foltorja e Kuvendit të Kosovës, gjatë prezantimit të buxhetit për vitin 2025, kryeministri Albin Kurti adresoi kritika ndaj Gjykatës Kushtetuese, duke e akuzuar për ndërhyrje politike në vendimet e saj.
Kurti ka theksuar se Gjykata Kushtetuese, në vend që të përqendrohet në dhënien e drejtësisë, shpesh bën bilanc politik.
“Siç edhe e dini që të dy ligjet, deputetët opozitarë i bllokuan duke i dërguar në Gjykatë Kushtetuese, eventualisht Gjykata që më shpesh bën bilanc politik sesa që ndan drejtësi, njërin ligj na e ryzoi, atë për çmimet tavan kurse tjetrin e miratoi, atë për pagën minimale. Dëm gjithsesi. Për të parin sepse nuk hyri në fuqi, kurse pr të dytin u vonua një vit zbatimi i tij. Pra qytetar të dashur përveç problemeve globale, neve na u deshtë ta navigonin edhe nëpër sfidat, pengesat e e vonesat e brendshme që na u shkaktuan”, ka thënë Kurti.
Gjatë fjalës së tij, Kurti lavdëroi Qeverinë e tij për buxhetin, teksa theksoi se janë qeveria e parë që prezanton katër buxhete në një mandat.
“Kryeministri i parë që prezanton buxhetin e katërt të mandatit, për të shënuar qeverinë e parë që e çon mandatin deri në fund. Buxheti është projektuar të jetë 3.6 miliardë euro, apo 9% më shumë se në vitin 2024, apo 60% më shumë se buxheti i vitit 2020. Për të arritur deri këtu, këto 4 vite kaluam nëpër shumë sfida, e për dallim nga të tjerët para nesh, u siguruam që buxheti të orientohet te qytetari, duke e bërë këtë vit pas viti. Buxheti i vitit 2025 është buxheti i katërt në këtë mandat”, ka shtuar Kurti.
“Buxheti për vitin 2025 është 3.6 miliard euro apo 9 për qind me i lartë se sa buxheti i viti të 2024… Karakteristik e këtij buxheti janë: buxheti për paga është 13 për qind me i lartë se vitin 2024, për mallra dhe shërbim 3.2 për qind se më i lartë se vitin 2024. Buxheti për investime kapitale është 3.8 për qind më i lartë se vitin 2024…”, ka thënë Kurti.