Ekipi i RTV Dukagjinit ka kuptuar që sot në teren do të dalin zyrtarët e “Elektroserverit” dhe të njëjtit do të shkojnë në pjesën veriore të vendit për të identifikuar dhe regjistruar shtëpitë dhe bizneset në këtë zonë, që pastaj të fillojë faturimi me energji elektrike.
Nga muaji mars, banorët në komunat veriore do të fillojnë të paguajnë borxhin e energjisë elektrike.
Gazetarja e RTV Dukagjini, Doruntina Bylykbashi, në emisionin “Rreth e Rrotull”, ka treguar se zyrtarët e Elektroserver-it e kanë njoftuar Policinë e Kosovës dhe në rast që hasin në rezistencë ndaj identifikimit dhe regjistrimit të shtëpive dhe bizneseve, atëhetë policia do të reagojë.
“Sot kanë filluar regjistrimet e shtëpive dhe bizneseve, dhe nga muaji mars pritet të fillojë faturimi i tyre për shpenzimin e energjisë elektrike, që pritet të ndodhë pas 24 vjetëve në pjesën veriore të Kosovës”, ka thënë ajo.
Ndërsa, për qëndrimet e qytetarëve lidhur me këtë situatë, Bylykbashi ka treguar se ekzistojnë të dyja polet, ka qytetarë që e kanë mirëpritur këtë vendim, por ka dhe të tjerë që thonë se duhet të jenë të barabartë me qytetarët e Republikës së Kosovës. Mirëpo mbi të gjitha, duket që nuk ka ndonjë rezistencë të madhe lidhur me këtë çështje.