Ka kohë që është premtuar e as shtatori i këtij viti, nuk do t’i gjejë banorët e lagjes “Sofalia” me një shkollë të re.
E kjo ngase punimet nisën më vonë sesa që ishte planifikuar.
Kontrata për shkollën “Sofalia” ishte nënshkruar në dhjetor të vitit 2022 ndërsa punimet, nuk nisën deri në fundin e vitit 2024.
Nga komuna, thonë se punimet i pezulluan shkaku i çështjev epronësore dhe i disa problemeve me operatorët.
E nga 7 shkolla të premtuara, brenda mandatit të saj komuna do t’i prejë shiritat e vetëm dy prej tyre, njëra prej të cilave vetëm është renovuar.
”Dy prej shkollave i kemi të gatshme në shtator të këtij viti, shkollën e mesme të hotelerisë “7 shtatori” dhe shkolla e mesme “Gjin Gazulli”. Janë të dyja profesionale dhe ka qenë nevojë e madhe t’i kemi objekte të reja. Prej 8 sa i kemi nisë, dy i kemi të gatshme dhe është rezultat i mirë…të tjerat janë duke u punuar, brenda afatit, por këto i kemi sivjet”, ka thënë Donat Lushaku, zëdhënës i Komunës së Prishtinës.
Përfundimi i punimëve është në pikëpyetje edhe në shkollën në lagjen “Qëndresa” në Veterrnik.
Për njohësit e arsimit, zhgënjyese mbetet neglizhenca në përfundimin e shkollave të reja që mbeten kyçe në implementimin e mësimit tërëditor.
”Ende nuk kemi institucion publik të ri e është për keqardhje, sidomos kur dihet rritja e numrit demografik i nxënësve brenda Prishtinës. Është për keqardhja se hapja e tyre bëhet në fund të mandatit dhe prezantohet për fitime elektorale dhe jo si përgjegjësi me përfitim për qytetarët. Ndërtimi i shkollave të reja ka edhe kontekst tjetër. Përpos numrit të rritur të fëmijëve është edhe forma për mësimin tërëditor e cila thërret për institucione të reja për të garantuar qëndrimin tërëditor në shkolla. Këto shkojnë paralel e jo të ndara. Shpresoj që kushdo Që vjen në qeverisje këtë ta ketë kapital e prioritet”, ka thënë Rinor Qehaja, njohës i arsimit.
Televizioni ka vizituar edhe shkollën në lagjen “Kalabria”, punimet në të cilën po vazhdojnë me intensitet më të lartë, por nuk dihet nëse do të bëhet e gatshme për muajin shtator, kur nis viti i ri shkollor.
Nga komuna, kanë deklaruar se vitin e ardhshëm do të përfundohen edhe tri shkolla të tjera.