“Një recetë nuk ka shpirt. Ju si kuzhinier duhet t’i jepni shpirt recetës”.
Kështu po e nisim rrëfimin e Rufi Shabanit nga Tetova, kuzhinierit i cili është menagjer i 11-të restorante në Rusi.
Përmes një lidhje telefonike në “Drive on D” me Donika Hysenin dhe Mirdon Pacollin, Radio Dukagjini sjell intervistën e një masterchef-i. Nga Tetova në Moskë, Shabani tregon se dashuria për gatimin lindi nga nëna e tij dhe “lidhja e pashoqe” me brumin.
“Pasioni për ushqimin ka lindur nga nëna. Ne krejt shqiptarët kemi punë me brume nga fëmijëria, nëna gatuante gjithmonë kur vija nga shkolla”, ka thënë ai gjersa ka theksuar se ndonëse gatimi i tij nuk mund të krahasohet me atë të nënave, është pikërisht nga këto të fundit origjina e profesionit dhe njëherit, pasionit të tij.
Ndonëse tash e 12 vite Moska është bërë qendër e biznesit të tij, ai tregon se që nga fillimi i konfliktit Ukrainë-Rusi, një kërkesë intensive për t’u kthyer në Tetovë nuk mungoi nga familja e tij. Lufta Ukrainë-Rusi ka tërhequr vëmendje botërore mirëpo e njëjta nuk është se ka paraqitur ndonjë problem të madh në mbarëvajtjen e biznesit dhe jetës në Moskë, ka treguar ai.
Pas fitores së dy çmimeve në Bullgari, Shabani ka treguar lokacionin e ardhshëm në të cilin pritet të marr pjesë në një garë gatimi
“Është diçka që e vlerësoj shumë. Me 20 shkurt të vitit të ardhshëm do të jem në një garë në Itali”, ka treguar ai.
Gatimi është një ndër format e përkryera për të treguar kulturën e një populli. Duke filluar nga flija e deri tek fasulet, ai tregon se ushqime kosovare i janë prezantuar popullit rus. Krahas kësaj, ai ka thënë se do donte të investonte në një restorant të tijin në të ardhmen, në Ballkan.
Një gjë është e sigurt. Shqiptarët janë kudo dhe të njëjtit, po na përfaqësojnë më së miri.