Pas shkarkimit të Naser Sahtit nga pozita e Rektorit të Universitetit të Prishtinës, ministrja e Arsimit, Arbërie Nagavci , për zgjedhjen e rektorit të ri të UP-së, ka thënë se me Qeverinë e tyre, atë do ta zgjedhë merita e tij.
“Me Qeverinë tonë, Rektoren ose Rektorin do ta zgjedhë merita e saj apo tij, të cilën, e konfirmojnë rezultatet e monitorimit dhe zgjedhja do të jetë plotësisht e denjë për misionin e sotshëm dhe historinë që bart ky institucion”, ka shkruar ajo në rrjetin social Facebook.
Sipas saj, kjo praktikë nuk është zbatuar asnjëherë deri më sot. “Unë do të sigurohem dhe garantojë që Rektorja/Rektori i ri në kohën time si Ministre do të jetë një zgjedhje objektive e jo i zgjedhur i diskrecionit i konjukturës së vjetër parapolitike e politike, siç ishte në të kaluarën e errët”, ka thënë tutje ajo.
Nagavci ka bërë të ditur se po e themelon për herë të parë një praktikë që do të transformojë rrënjësisht e cilësisht mënyrën e zgjedhjes së Rektores apo Rektorit, e pastaj sipas saj, edhe mbarëvajtjen e punës në Universitetin e Prishtinës.
Ndërsa, për mbështetje në këtë proces, Nagavci ka treguar se i ka dërguar letër zyrtare Ambasadorit të ShBA-së, dhe do t’ua nisë të njëjtën kërkesë ambasadorëve të tjerë të QUINT-it dhe atij të Bashkimit Evropian.
“Dje iu drejtova me një letër zyrtare Ambasadorit të ShBA-së, dhe do t’i drejtojë të njëjtën kërkesë ambasadorëve të tjerë të QUINT-it dhe atij të Bashkimit Evropian, për mbështetje në këtë proces të rëndësishëm, ashtu si edhe për bashkëpunimin e mëtutjeshëm për përmirësimin e performancës në Universitetin e Prishtinës”, ka shkruar ajo.
“Do t’i takojë personalisht akterët ndërkombëtarë në reformat e arsimit të lartë gjithashtu ditëve në vijim për t’iu kërkuar të njëjtën. Të njëjtën do ta bëj edhe me përfaqësuesit e organizatave të shoqërisë civile që monitorojnë procese të reformave arsimore që të diskutojë me ta dhe t’iu kërkojë përfshirje direkte në këtë proces”.
Ndërkaq, ajo ka premtuar që anëtarët e MAShTI-t në Këshillin Drejtues të UP-së do të jenë të pandikueshëm, profesionist, transparent dhe në koordinim me monitoruesit ndërkombëtarë dhe atyre të organizatave të shoqërisë civile.