Ngjarja historike që ndryshoi Kosovën, 15 vjet nga festa e parë e pavarësisë

Rruga kryesore e Prishtinës më 17 shkurt të vitit 2008 ishte një "det i kuq" me shumicën e njerëzve që mbanin dhe valëvitnin flamurin shqiptar. Pavarësisht motit të ftohtë, me një diell thumbues, shumë prej tyre arritën disa orë para shpalljes së pavarësisë së Kosovës në Kuvend, duke e parë këtë si një moment përcaktues për vendin

Turmat festuan shpalljen e pavarësisë së Kosovës rreth skulpturës “Newborn” më 17 shkurt 2008.

Në këtë ditë, 15 vjet më parë, përfaqësuesit e popullit të Kosovës miratuan Deklaratën e Pavarësisë së Kosovës dhe shpallën njëzëri pavarësinë e Kosovës.

Ngjarja madhështore për qytetarët shqiptarë të Kosovës kujtohet gjithmonë duke u lexuar deklarata që e bëri vendin shtet të pavarur dhe sovran në orën 15:39, të datës 17 shkurt, ditë e diel dimri me diell e vitit 2008.

Ky ishte momenti kur Kosova zbatoi propozimin e Ahtisarit, që ishte shpallja e pavarësisë. 109 deputetë votuan në Kuvendin e Kosovës, Hashim Thaçi, kryeministër i asaj kohe, nuk e la as kryeparlamentarin që udhëhoqi institucionin dhe as presidentin ta lexojë deklaratën e pavarësisë, duke e bërë këtë vetë.

Kështu nisi deklarata për një jetë të re për Kosovën dhe popullin e saj, e lexuar nga Thaçi: “I nderuari zotëri kryetar i Kuvendit, i nderuari president, të nderuar deputetë, të nderuar mysafirë, e nderuara familja Jashari, e nderuara familja Rugova. Faleminderit Shtetet e Bashkuara të Amerikës, Bashkim Evropian dhe NATO, respekt. Tani më lejoni që duke ndjerë rrahjet e zemrës të stërgjyshërve tanë, me nderin dhe privilegjin më të madh do ta lexoj deklaratën e pavarësisë së Kosovës”.

Hashim Thaçi, kryeministër i asaj kohe duke lexuar deklaratën për shpalljen e pavarësisë së Kosovës, 17 shkurt, 2008.

“Duke nderuar të gjithë burrat dhe gratë që bënë sakrifica të mëdha për të ndërtuar një të ardhme më të mirë. Ne udhëheqësit e popullit tonë, të zgjedhur në mënyrë demokratike, nëpërmjet kësaj deklarate shpallim Kosovën shtet të pavarur dhe demokratik”, kështu përfundoi deklarata e Thaçit për shpalljen e pavarësisë së Kosovës, dhe nisi rrugëtimi i një jete të re për Kosovën.

Kuvendi i Kosovës pas leximit të deklaratës për shpalljen e pavarësisë së Kosovës, 17 shkurt, 2008.

Ndërsa, ende pa u bërë shpallja zyrtare nga Kuvendi i Kosovës, dhjetëra mysafirë në sallë e mijëra njerëz në sheshet e Prishtinës, të të gjitha qyteteve të tjera të Kosovës e kudo nëpër botë dolën në rrugë për të festuar momentin e dytë më të madh në një shekull për shqiptarët.

Qytetarët duke festuar rrugëve të qyteteve qëlluan me armë, valëvitën flamujt shqiptarë kuqezi dhe ndezën fishekzjarrë mbi qiellin e Kosovës të dielën pasi parlamenti shpalli pavarësinë në kundërshtim me Serbinë dhe Rusinë, të cilat dënuan shpalljen e kombit më të ri në botë.

Në kryeqytetin, Prishtinë, qytetarët ishin plot gëzim. Mijëra shqiptarë etnikë u përballën deri në orët e vona të së dielës me temperaturat e ulëta duke hipur mbi makinat e tyre, duke kënduar këngë patriotike dhe duke brohoritur: “UÇK! akronimi për Ushtrinë Çlirimtare të Kosovës. Ata valëvitën flamuj amerikanë krahas flamurit të kuq shqiptar, me një shqiponjë të zezë, dykrenare.

Shqiptarët e Kosovës valëvitin flamujt uke festuar pavarësinë e Kosovës, 17 shkurt 2008.

Shumë prej tyre ishin veshur me kostume tradicionale dhe u binin borive dhe daulleve, dhe një çift shqiptar e quajti vajzën e tyre të porsalindur Pavarësie – për nder të ditës së pavarësisë së shtetit të tyre.

Kuvendi menjëherë pas shpalljes së pavarësisë zbuloi gjithashtu flamurin e ardhshëm të Kosovës, një flamur blu të ndezur që shfaq në mes një hartë të artë të Kosovës dhe gjashtë yje, një për secilin nga komunitet e ndryshme që jetojnë në Kosovë.

Presidenti Sejdiu dhe kryeministri Thaçi prezantojnë flamurin e Republikës së Kosovës, 17 shkurt 2008.

Por, pak nga flamujt e rinj u panë të dielën në rrugët e Kosovës, ku ende dominonte banderola e vjetër shqiptare.

Shqiptarët e Kosovës valëvitin flamujt uke festuar pavarësinë e Kosovës, 17 shkurt 2008.

Mes turmës u shpërndanë gota shampanjë dhe një torte e madhe ishte vendosur në mes qendrës së qytetit të Prishtinës, ku ishin mbledhur rreth saj mijëra festues të zjarrtë.

Torta e gjatë e festës së shpalljes së pavarësisë së Kosovës, 17 shkurt 2008.

Një monument që u quajt New Born (i porsalinduri), u bë simboli i shtetit më të ri në botë në vitin 2008.

Udhëheqësit e Kosovës ishin të parët që nënshkruan emrat e tyre në skulpturën gjigante që shkruante “NEWBORN” përpara se të niseshin në një sallë sportive për një performancë të “Odës së Gëzimit” të Beethoven nga Orkestra Filarmonike e Kosovës.

Një dekadë më parë, Fisnik Ismaili projektoi skulpturën për të festuar shpalljen e pavarësisë së Kosovës, me shkronja 10 metra, e lyer me një ngjyrë të verdhë të ndezur.

Monumenti “NewBorn”, pas shpalljes së pavarësisë së Kosovës, 17 shkurt 2008.

Në mbrëmjen që u zbulua skulptura në Prishtinë, po ashtu mbi 150 mijë njerëz e nënshkruan atë. Njerëzit vazhdonin të shkonin, të ngjiteshin në të, dhe të shkruanin mbi të, e që kjo kishte vazhduar me orë të tëra.

Pas zbulimit më 17 shkurt 2008, “Newborn” shpejt u bë simbol i Kosovës. Ajo u shfaq në faqen e parë të “The New York Times” të nesërmen. Ndërsa, në vitin 2012, Rita Ora, ylli i popit kërceu mbi të në një videoklip të këngës së saj.

Plani fillestar i Ismailit për “Newborn” ishte ruajtja e tij me mbishkrimet që nga nata kur u zbulua. Por, njerëzit vazhduan të nënshkruanin, kështu që u vendos që ai ta rilyejë atë çdo vit në përvjetorin e shpalljes së pavarësisë, duke filluar nga pikturimi i flamujve të vendeve që e kishin njohur Kosovën si një komb sovran.

Qytetarët kremtojnë Ditën e Pavarësisë, 17 shkurt 2008.

Skulptura mbeti e pandryshuar për pesë vjet, derisa u bë aq e pistë sa duhej të ringjyrosej.

Varësisht prej matjes së diferencës kohore Kosta Rika dhe Afganistani ishin shtetet e para që e njohën pavarësinë e Kosovës. Brenda katër ditëve nga shpallja e pavarësisë së Kosovës, pesëmbëdhjetë shtete (përfshirë Shtetet e Bashkuara, Mbretërinë e Bashkuar, Francën, Gjermaninë, Italinë dhe Australinë) e njohën pavarësinë e Kosovës.

Beogradi reagoi ashpër, e protestuesit dogjën ambasadën amerikane. Të nesërmen edhe pikat kufitare me Serbinë u dogjën, por shpallja e madhe e së dielës kaloi pa incidente serioze.

Thaçi gjithashtu nënshkroi 192 letra të veçanta drejtuar kombeve anembanë botës – përfshirë Serbinë – duke u kërkuar atyre që ta njohin Kosovën si shtet.

Shija e redaktorit

Zgjedhjet lokale, nesër intervistohen mbi 50 mijë qytetarë për Exit...

Zgjedhjet lokale që do të mbahen nesër në 38 komunat e vendit do të shënojnë një rekord historik sa i përket Exit Poll-eve. Në kuadër...

Debati për Prishtinën, paratë e mbledhura nga mesazhet në Debat...

Mbrëmë studio e Debat Plus ishte nikoqire e debatit më të madh e vendimtar në kuadër të garës për zgjedhjet lokale në Prishtinë. Kundër kandidatët...

Mijëra dronë “Skydagger” mbërrijnë në Prishtinë, njofton Kurti: FSK po...

Kontejnerë që mbajnë mijëra dronë luftarakë kamikazë të markës Skydagger mbërritën sot në Aeroportin Ndërkombëtar “Adem Jashari”, njoftoi kryeministri në detyrë Albin Kurti. Sipas Kurtit,...

Të fundit nga rubrika