Prokuroria Themelore në Mitrovicë këtë të hënë ka ngritur aktakuzë kundër dy rusëve të cilët janë ndaluar të dielën në Jarinjë për shkak se nuk kishin viza të Kosovës.
Lajmin për Dukagjinin e ka bërë të ditur zëdhënësi i Prokurorisë Themelore të Mitrovicës, Valon Preteni.
Ai ka thënë se në kuadër të kërkesës për aktakuzë është dëbimi i rusëve nga Kosova.
“Prokuroria Themelore në Mitrovicë për dy personat e ndaluar, ka ngritur aktakuzë me kërkesën për dëbim jashtë territorit të Kosovës, për shkak të veprës penale “Kalimi i paautorizuar i vendkalimeve kufitare ose i vijës kufitare”, ka thënë Preteni për Dukagjinin.
Megjithatë, ai ka thënë se të dyshuarit janë ndaluar për 48-orë.
Ndalohen dy persona me pasaportë ruse në Jarinjë, dyshohet se kaluan rrugëve ilegale
Një burrë dhe një grua me pasaporta ruse janë arrestuar në Jarinjë, nën dyshimin se kanë hyrë në Kosovë nga rrugë ilegale.
Ata u ndaluan pasi nuk kishin viza për Kosovën dhe nuk kishin asnjë shenjë hyrjeje të ligjshme.
Sipas policisë, ata kishin ardhur nga Nishi i Serbisë.