Prokuroria Speciale e Republikës së Kosovës ka ngritur aktakuzë ndaj një shtetasi të Kosovës, i cili kishte marrë pjesë në konfliktin në Siri dhe Irak gjatë periudhës kohore 2014 – 2017.
Ky person dyshohet për krim kundër njerëzimit dhe shkelje të rëndë të ligjeve dhe të zakoneve që zbatohen në konfliktet e armatosura, e që nuk janë të karakterit ndërkombëtar.
Sipas Prokurorisë Speciale të Republikës së Kosovës (PSRK), këto vepra janë kryer ndaj vajzave dhe grave të komunitetit “Yazzid”.
Prokuroria ka njoftuar se kjo çështje penale tashmë ka kaluar në kompetencë të Departamentit Special të Gjykatës Themelore në Prishtinë për procedurë të mëtutjeshme.
Po ashtu, PRSK-ja njofton se i pandehuri gjendet nën masën e sigurisë – paraburgim, sipas vendimit të Gjyqtarit të Procedurës Paraprake, deri në një vendim të ri nga ana e gjykatës.