Prokuroria Themelore në Gjakovë ka njoftuar se ka ngritur aktakuzë kundër të pandehurit me iniciale, D.LL i cili ngarkohet se vrau N.N (47-vjeçar) pasi ky i fundit ia kishte vrarë babanë 12 vjet më parë.
Vrasja sipas aktakuzës thuhet se ka ndodhur në vitin 2003 në fshatin Raçë të Gjakovës, kur i akuzuari thuhet se është hakmarrë për vrasjen e babait të tij.
Me këtë, D.Ll., akuzohet se ka kryer veprën penale “Vrasje”.
“Sipas aktakuzës ndër tjera cekët se i pandehuri D.LL., me dt.12.07.2003, rreth orës 09:00, në fshatin Raçë, Komuna Gjakovë, në afërsi të dyqanit “V…”, me dashje e nga gjakmarrja ka privuar nga jeta N.N., i moshës 47 vjeçare, nga fshati Raçë, Komuna Gjakovë, në atë mënyrë që për shkak të vrasjes së babait të tij, të cilin para 12 vitesh e kishte privuar nga jeta i ndjeri N.N., ditën kritike i pandehuri, shkon në vendin e lartcekur me veturën e tij Golf 3, ngjyrë e kuqe, duke i përcjellë lëvizjet e tani të ndjerit dhe kur i njëjti ka hyrë në dyqan “V…”, për të blerë ca gjëra ushqimore, i pandehuri D.LL., e pret e me të vërejtur se del nga dyqani prej një afërsie shtënë në drejtim të tij 28 herë në pjesë të ndryshme të trupit, dhe kur viktima bie përtokë, i pandehuri përsëri shtënë në drejtim të kokës së viktimës, duke i shkaktuar plagë të shumta me armë në kokë, gjoks dhe gjymtyrë, nga plagët e marra viktima ka mbetur i vdekur në vendin e ngjarjes”, thuhet në njoftimin e Prokurorisë.
I pandehuri nga koha e kryerjes së kësaj vepre penale thuhet se ka qenë në arrati. Në njoftim thuhet se ai është arrestuar me urdhër arrest ndërkombëtar dhe është ekstraduar nga ShBA-ja në Kosovë.
Në njoftim thuhet se prokurori i çështjes me rastin e ngritjes së aktakuzës, i ka propozuar gjykatës që të pandehurin ta shpallë fajtor dhe të dënohet sipas ligjit për veprën penale e cila i vihet në barrë.