Presidenti Nicolás Maduro tha se kishte urdhëruar një bllokim 10-ditor të aksesit në X në Venezuelë, duke akuzuar pronarin Elon Musk për përdorimin e rrjetit social për të nxitur urrejtje pas zgjedhjeve të diskutueshme presidenciale të vendit.
Gazetarët e Associated Press (AP) në Karakas zbuluan se të enjten mbrëma postimet kishin ndaluar së ngarkuari në X në dy shërbime telefonike private dhe në Movilnet në pronësi të shtetit.
“Elon Musk është pronar i X dhe ka shkelur të gjitha rregullat e vetë rrjetit social”, tha Maduro në një fjalim pas një marshimi nga grupet pro-qeveritare. Ai pretendoi se Musk kishte “nxitur urrejtje”, sipas The Guardian.
Maduro akuzoi gjithashtu rrjetin social se po përdoret nga kundërshtarët e tij për të krijuar trazira politike.
Presidenti i Venezuelës tha se kishte nënshkruar një rezolutë “me propozimin e bërë nga Conatel, Komisioni Kombëtar i Telekomunikacionit, i cili ka vendosur të heqë rrjetin social X, i njohur më parë si Twitter, nga qarkullimi në Venezuelë për 10 ditë në mënyrë që ata të mund të paraqesin dokumentet e tyre.“ Maduro nuk dha më shumë detaje në lidhje me procesin e ndërmarrë kundër X.
“X jashtë për 10 ditë! Elon Musk jashtë!” ka thënë Maduro.
Zyra e shtypit e X nuk iu përgjigj menjëherë një emaili që kërkonte koment.
Maduro dhe Musk kanë shkëmbyer akuza për zgjedhjet e diskutueshme presidenciale të Venezuelës më 28 korrik.
Autoritetet elektorale shpallën fitues Maduro-n, por ende nuk kishte arritur të nxirrte numërimin e votave. Opozita pretendon se ka mbledhur të dhëna nga më shumë se 80% e 30,000 makinerive elektronike të votimit në mbarë vendin, duke treguar se fituesi ishte kandidati i saj, Edmundo González.
Musk përdori rrjetin social për të akuzuar liderin e vetëshpallur socialist për një “mashtrim të madh elektoral”. “Turp për diktatorin Maduro”, tha Musk në një postim të hënën.
Që nga zgjedhjet, Maduro ka shprehur nevojën për të “rregulluar” rrjetet sociale në Venezuelë. Ai gjithashtu pretendoi se platforma sociale ishte përdorur nga kundërshtarët e tij për të kërcënuar familjet e ndjekësve dhe aleatëve të tij politikë, personelin ushtarak, oficerët e policisë dhe për të krijuar një gjendje ankthi në Venezuelë.