Zenun Nimani nga Sindikata e Bashkuar e Arsimit, Shkencës dhe Kulturës, ka komentuar videon e Lëvizjes Vetëvendosje, në të cilën është kritikuar opozita duke thënë se për 20 vjet rresht në Kosovë kanë qeverisur “shkatërruesit e shtetit” që nuk duan ta shohin Kosovën mirë.
Në video shihet edhe kryetari i SBAShK-ut, Rrahman Jasharaj, i cili ka shpallur greva të përgjithshme që nga 25 gushti, për të cilin kryeministri i Kosovës, Albin Kurti, kishte thënë se ka koalicion me PAN-in.
Këtë video, Nimani e ka quajtur si një shantazh të pabazë dhe irritues.
“Ky është një shantazh i pa pikë baze dhe shumë irritues. Rrahman Jasharaj nuk është marrë me politikë pothuajse kurrë, sidomos i treti mandat që është kryetar i SBASHK-ut as me votu nuk ka dalë vetëm të mos etiketohet me një etiketë politike”, ka thënë Nimani.
I ftuar në emisionin “Debat Plus”, në RTV Dukagjini, Nimani ka thënë se kryeministri i Kosovës, Albin Kurti, në kohën sa ishte në opozitë, kishte raporte të mira me sindikatën, e veçanërisht me kryetarin e SBASHK-ut, Rrahman Jasharaj.
“Është bërë virale marrëveshja që është bërë në vitin 2017, por edhe kryeministri i tashëm ka pasur raporte me Rrahman Jasharin, ka punuar bashkë në shumë çështje dhe me kënaqësinë më të madhe kryeministri i tashëm sa ka qenë në opozitë, çdo kërkesë, çdo herë kur ka kërkuar takim, me kënaqësi e ka pritur Jasharin dhe janë të incizuara premtimet dhe qasja e tij si opozitar”, shtoi ai.
Kjo video vjen në ditën kur grevat janë pezulluar dhe mësimi ka filluar, dhe ditë në të cilën Qeveria e Kosovës nuk ka ekzekutuar pagat për mësimdhënësit.
“Shkatërruesit e shtetit që nuk duan ta shohin Kosovën mirë, për 20 vite kanë qeverisur vendin. Herë vetëm e herë njëri me tjetrin. Formalisht të ndarë në parti të ndryshme, por praktikisht në një qëllim”, thuhet në postimin e tyre.
Sipas tyre, opozita kishte vetëm një qëllim.
“Rreth Kosovës së përbashkuar që e shihni veç si tender, si ryshfet, si haraç, si krim, si korrupsion e si çka tjetër. Ishte vetëm një subjekt që s’ishte në anën e tyre, VETËVENDOSJE”, thuhet më tutje.