Serbët lokalë kanë nisur që t’i largojnë barrikadat në Rudar të Zveçanit, pas 20 ditësh bllokim të rrugëve dhe pengim të lëvizjes të lirë.
Mehmet Krasniqi, gazetari nga RTV Dukagjini, i cili gjendet në vendin e ngjarjes, ka bërë të ditur se barrikadat e vendosura në këto rrugë kanë filluar të largohen.
Persona që janë parë duke i larguar këto barrikada ishin të maskuar.
Ndryshe, që nga e shtuna e 10 dhjetorit, serbët lokalë kanë ngritur barrikada në shenjë pakënaqësie për arrestimin e një ish-pjesëtari serb të Policisë së Kosovës, Dejan Pantiq, për të cilin, autoritetet në Kosovë thonë se ka organizuar sulmet ndaj zyrave të Komisionit Qendror të Zgjedhjeve në veri.
Ndërkaq më 28 dhjetor, autoritetet në Kosovë ndryshuan masën e sigurisë, nga paraburgimi në arrest shtëpiak për Dejan Pantiq.
Pas kësaj, presidenti i Serbisë, Aleksandër Vuçiq tha se heqja e barrikadave në veri të Kosovës do të nisë mëngjesin e së enjtes.