Verifikimi i disertacioneve të doktoratave dhe publikimeve shkencore të 2835 anëtarëve të stafit akademik të Kosovës nga Agjencia e Kosovës për Akreditim ka filluar, ka bërë të ditur Ministrja e Arsimit, Arbërie Nagavci.
Anëtarët e stafit akademik kanë ngarkuar dokumentet në platformën e AKA-së, “E-Akreditimi” sipas vendimit të Ministrisë së Arsimit, për hulumtimin e stafit akademik të institucioneve të arsimit të lartë (IAL).
“Me këtë vendim, obligohen të gjitha IAL-të në Republikën e Kosovës që me rastin e deklarimit të stafit akademik në platformën e-akreditimi të AKA-së, të bëjnë ngarkimin e disertacionit të doktoratës dhe të publikimeve në revistat e indeksuara, në platformat e përcaktuara me Manualin e AKA-së për akreditim”, thuhet në shkrimin e Nagavcit.
Ministria ka njoftuar se deri më 31 tetor, 2835 anëtarë të stafit akademik i kanë ngarkuar disertacionet e doktoratave dhe listën me publikime shkencore në platformën e AKA-së, E-Akreditimi.
Lidhur me këto dokumente, Nagavci ka njoftuar se ato do të ruhen me konfidencialitet të plotë nga AKA-ja dhe do të jenë subjekt i verifikimit dhe luftimit të plagjiaturës. Krahas kësaj, bëhet e ditur se MASHTI ka ndarë edhe 150 mijë euro në buxhetin e vitit 2023.