Prokuroria Themelore në Prizren ka njoftuar opinionin publik se, në bashkëpunim me Policinë e Kosovës – Drejtorinë për Hetimin e Krimeve Ekonomike dhe Korrupsion, ka iniciuar hetime për rastin e rinumërimit të votave në Qendrën Komunale të Numërimit në Dragash.
Veprimet u ndërmorën pas pranimit të informatave lidhur me procesin e rinumërimit, me autorizim të kryeprokurorit, Petrit Kryeziu, dhe po kryhen me vetiniciativë të Prokurorisë.
Hetimet lidhen me dyshimet për shkelje të të drejtave të votimit, të parashikuara në Kapitullin XVIII të Kodit Penal të Republikës së Kosovës (KPRK).
Prokuroria ka bërë të ditur se gjatë ditës, pas intervistimit të të dyshuarve në polici, do të lëshohet një komunikatë shtesë me informacione mbi veprimet dhe zhvillimet e mëtejshme hetimore.