Të dielën e pesë qershorit, një 26-vjeçar, shtetas i huaj, është gjetur pa shenja jete në Qendrën e Azilit në Magurë të Lipjanit.
Lajmin për PortaliD e ka konfirmuar zëdhënësi i policisë për rajonin e Prishtinës, Agron Borovci.
Borovci ka thënë se policia ka nisur hetimet lidhur me rastin në fjalë.
“Rreth orës 09:15, është pranuar informata për një trup të pajetë, në Qendrën e Azilit në Magurë të Lipjanit. Policia menjëherë ka dalë në vendin e ngjarjes si dhe mjekët emergjentë, të cilët kanë konstatuar vdekjen e viktimës, mashkull, 26 vjeç, shtetas i huaj”, tha Borovci.
Ai ndër të tjera, ka shtuar se aktualisht policia ka nisur një hetim mbi vdekjen, dhe me kujdes të shtuar po ndërmerr të gjitha veprimet e duhura hetimore dhe ekzaminuese, që do të ndihmojnë hetimin e ngjarjes, si dhe ndriçimin e plotë të rastit.