Drejtoria Vendore e Policisë Tiranë ka nxjerrë këtë të enjte një ftesë për paraqitje për t’u marrë në pyetje të kompozitorit Adrian Hila, në lidhje me videot intime që u shpërndanë një ditë më parë në rrjetet sociale.
Në kuadër të veprimeve të Policisë, efektivët kanë shkuar edhe në banesën e kompozitorit për ta kontaktuar dhe marrë në pyetje, por nuk e kanë gjetur aty.
Siç raporton Top Channel, Policia ka mundur të kontaktojë në telefon me kompozitorin i cili është shprehur se është shumë i shokuar, i tronditur dhe se e kanë hakuar.
Hila, mes tjerash, ka deklaruar se do të paraqitet në polici sapo të mbërrijë në Tiranë.
Marrja në pyetje e Hilës lidhet me videot me përmbajtje intime që kanë qarkulluar në rrjetet sociale gjatë ditës së djeshme.
Një ditë më parë, strukturat e Krimit Kibernetik kanë nisur verifikimet për përmbajtjen dhe burimin e materialeve të shpërndara në rrjetet sociale.
Në videot intime që po qarkullojnë, Hila shfaqet me personazhe të ndryshme publike në studion e tij. Raportohet se ato video kanë qenë të qasshme në faqet pornografike me pagesë. Ende nuk është e qartë se si kanë rrjedhur videot dhe nëse personazhet kanë qenë në dijeni se po incizohen.