Një ekip prej gjashtë anëtarësh nga Shoqata e Kërkim-Shpëtimit të Kosovës, të enjten e nëntë shkurtit është nisur drejt Turqisë.
Kështu ka bërë të ditur Ambasada e Turqisë në Prishtinë, përmes një njoftimi në Facebook.
“Sot në mëngjes, një ekip prej 6 anëtarësh të Shoqatës së Kërkim-Shpëtimit të Kosovës u nisën për në vendin tonë për të marrë pjesë në përpjekjet e kërkim-shpëtimit në zonat e tërmeteve. Falënderojmë ekipin e KSRA”, thuhet në njoftim.
Ndryshe, ministri i Mbrojtjes, Armend Mehaj, ka thënë se kontingjenti i Forcës së Sigurisë së Kosovës, po realizon me sukses të lartë operacionin e kërkim-shpëtimit në Turqi pas tërmetit shkatërrimtar.
Ai ka bërë të ditur se ekipi i kërkim-shpëtimit nga Kosova, po operon në rajonin Hatay në Turqi, i cili siç thotë Mehaj është rajoni më i goditur.
“Kontingjenti i FSK-së në Republikën e Turqisë që nga orët e hershme të mëngjesit është duke operuar në provincën Hatay të Turqisë në mbështetje të autoriteteve turke për kërkimin dhe shpëtimin e jetëve të njerëzve nën gërmadha”, ka thënë ai.
Mehaj shtoi se specialistët e kërkim-shpëtimit urban dhe ekipet e mjekësisë emergjente dhe ata K9, të zbarkuar para dy ditësh në Republikën e Turqisë, me përkushtim dhe profesionalizëm të lartë janë duke zhvilluar operacionet e kërkim-shpëtimit në koordinim me autoritetet turke dhe ekipet e shpëtimit nga vende të ndryshme të botës.
Numri i të vdekurve nga tërmeti shkatërrues që goditi Turqinë dhe Sirinë, ka kaluar mbi 16 mijë.
Gjatë natës, ekipet e shpëtimit vazhduan të kërkojnë për të mbijetuar mes rrënojave të strukturave të shembura, por shpresat për të gjetur më shumë njerëz të gjallë shkojnë duke u zvogëluar, pasi kanë kaluar më shumë se tri ditë që nga goditja nga tërmetet.
Përpjekjet e shpëtimit janë penguar nga temperaturat e ulëta dhe qindra pasgoditje, të cilat e kanë bërë veçanërisht të rrezikshme punën në strukturat e paqëndrueshme.
Në Turqi, mbi 60,000 njerëz janë plagosur dhe më shumë se 12,873 kanë humbur jetën, sipas agjencisë së menaxhimit të fatkeqësive.
Në Siri janë raportuar mbi 2,900 viktima.
Tërmeti i parë i 6 shkurtit ishte 7.8 ballësh me epiqendër rreth 26 kilometra nga qyteti Nurdagi dhe rreth 33 kilometra larg qytetit Gaziantep, tha Shërbimi Gjeologjik amerikan.
Po ashtu, gjatë po asaj dite, u regjistrua një tërmet tjetër i fuqishëm prej 7.5 shkallësh të Rihterit.
Presidenti i Turqisë, Recep Tayyip Erdogan, vizitoi të mërkurën provincën e Hataitit, e cila është goditur rëndë, prej ku banorët kanë kritikuar përpjekjet e qeverisë, duke thënë se ekipet e kërkim-shpëtimit shkuan me vonesë.
Numri i të vdekurve nga tërmeti në Turqi e Siri arrin në mbi 16 mijë