Të paktën një person ka humbur jetën dhe 10 të tjerë janë plagosur pas një sulmi masiv me dron që goditi rajonin e Krasnodarit, në jug të Rusisë.
Lajmin e bëri të ditur guvernatori i rajonit, Veniamin Kondratyev, i cili tha se sulmet ndodhën gjatë natës.
“Rajoni i Krasnodarit u sulmua masivisht mbrëmë. Fatkeqësisht, sulmi la një të vdekur dhe 10 të tjerë të plagosur”, shkroi ai në platformën Max.
Sipas Kondratyevit, në qytetin Armavir, fragmente nga një dron ranë në ambientet e një objekti industrial, ku si pasojë mbeti i vrarë një punonjës. Ndërkohë, në qytetin e Krasnodarit, dhjetë persona u plagosën pasi një depo u godit gjatë sulmit.
Autoritetet ruse po hetojnë rrethanat e sulmit dhe dëmet e shkaktuara.