Gjykata Themelore në Prishtinë – Departamenti Special, ka caktuar masën e paraburgimit prej një muaji ndaj të pandehurit me inicialet J.R., i dyshuar për kryerjen e veprës penale “Krime lufte kundër popullsisë civile”.
Vendimi është marrë pas kërkesës së Prokurorisë Speciale të Republikës së Kosovës për caktimin e masës së paraburgimit ndaj të pandehurit, për të cilin ekziston dyshimi i bazuar se ka kryer veprën penale nga neni 142 lidhur me nenin 22 të ish-Ligjit Penal të ish-RSFJ-së.
Pas seancës dëgjimore, gjyqtarja e procedurës paraprake ka aprovuar kërkesën e Prokurorisë Speciale.
“Gjyqtarja e procedurës paraprake ka aprovuar kërkesën e Prokurorisë Speciale të Republikës së Kosovës për caktimin e masës së paraburgimit ndaj të pandehurit J.R., duke caktuar masën e paraburgimit në kohëzgjatje prej 1 (një) muaji”, thuhet në njoftimin e Gjykatës.
Sipas Gjykatës, masa e paraburgimit është caktuar për shkak të rrezikut që i pandehuri mund të arratiset dhe të shmangë përgjegjësinë penale.
“Ekziston rrezik real që nëse i pandehuri lihet në liri, mund të arratiset me qëllim të fshehjes dhe ikjes nga përgjegjësia penale. Po ashtu, i njëjti është edhe shtetas i Serbisë, andaj ekziston rreziku real që të arratiset lehtë dhe të jetë i paarritshëm për organet e drejtësisë”, ka bërë të ditur Gjykata.
Në arsyetimin e vendimit thuhet gjithashtu se ekziston mundësia që i pandehuri të ndikojë në prova dhe dëshmitarë gjatë zhvillimit të procedurës.
“Gjykata gjithashtu vlerësoi se nëse i pandehuri lihet në liri, ekziston rreziku që i njëjti të ndikojë në prova dhe në dëshmitarë”, thuhet në njoftim.
Ndaj këtij vendimi, palët kanë të drejtë ankese në Gjykatën e Apelit, përmes Gjykatës Themelore në Prishtinë.
Javën e kaluar u arrestuan tre persona në Zubin-Potok të dyshuar për krime lufte në Kosovë. Të martën u zbulua një varr masiv në fshatin Kalludër të Zubin-Potokut ndërsa të dielën ministri në detyrë i Brendshëm, Xhelal Sveçla, konfirmoi zbulimin e një varri tjetër masiv në fshatin Jabukë të Zubin-Potokut.