Një aksident i rëndë trafiku ka ndodhur mbrëmjen e së dielës në Rahovec, ku një person ka humbur jetën.

Policia e Kosovës njofton se ngjarja ka ndodhur rreth orës 20:25, në rrugën “UÇK”, ku janë përfshirë një veturë dhe një motoçikletë.

Si pasojë e përplasjes, drejtuesi i motoçikletës, një mashkull kosovar, ka pësuar lëndime të rënda trupore.

Ai fillimisht është dërguar në Qendrën e Mjekësisë Familjare në Rahovec, e më pas në Spitalin Rajonal të Gjakovës, por fatkeqësisht nuk ka arritur t’u mbijetojë plagëve.

Policia bën të ditur se vdekjen e viktimës e ka konstatuar mjeku kompetent, ndërsa trupi i pajetë është dërguar në Institutin e Mjekësisë Ligjore (IML) për obduksion, me urdhër të prokurorit.

Ndërkohë, drejtuesi i veturës ka pësuar lëndime dhe është dërguar për trajtim mjekësor. Prokurori i rastit ka urdhëruar ndalimin e tij për 48 orë, deri në përfundim të procedurave hetimore.