Qendra Kryesore e Mjekësisë Familjare në Komunën e Podujevë, ka njoftuar se mbrëmë rreth mesnatës derisa ekipa emergjente ishte në detyrë, një person i pa përgjegjshëm ka penguar mbarvajtjen e punës duke filluar me fyerje e kanosje ndaj infermieres, dhe më pas edhe me dhunë fizike ndaj infermierit tjetër të ekipës.
“Si staf menaxhues në emër të QKMF-së shprehim indinjatë dhe dënojmë ashpër fyerjet dhe sulmin ndaj punëtorëve shëndetësor. Mbrëmë rreth mesnatës derisa ekipa emergjente ishte në detyrë duke kryer si gjithmonë me përgjegjësi të lartë shërbimin ndaj qytetarëve person i pa përgjegjshëm pengon mbarvajtjen e punës duke filluar me fyerje e kanosje ndaj infermieres derisa eskalon edhe me dhunë fizike ndaj infermierit tjetër të ekipës”, thuhet në njoftim.
Stafi i QKMF-së, në Podujevë, thekson se sulmet e tilla në vendin e punës janë shqetësuese dhe tolerimi i rasteve të tilla krijon precedent të rrezikshëm për të ardhmen duke nxitur pasiguri në punë në mesin e komunitetit shëndetësor.
Rasti është paraqitur menjëherë në polici, kurse infermieri dhe infermierja për shkak të shqetësimeve janë liruar për në shtëpi.