Prokuroria Themelore në Prishtinë ka dhënë detaje lidhur me rënien e kranit në një vendpunishte në Prishtinë, ku një punëtor humbi jetën e një tjetër mbeti i lënduar.
Sipas Prokurorisë, rasti është raportuar më 28 korrik 2026 rreth orës 15:00, ndërsa menjëherë pas pranimit të informatës, prokurori kujdestar nga Departamenti i Përgjithshëm ka dalë në vendin e ngjarjes së bashku me Policinë e Kosovës, Njësinë Rajonale të Hetimeve dhe Inspektoratin e Punës.
Me urdhër të Prokurorit të Shtetit janë angazhuar ekspertë të pavarur të sigurisë në punë dhe një ekspert i inxhinierisë mekanike. Në vendin e ngjarjes janë siguruar prova materiale, janë sekuestruar pamjet e kamerave të sigurisë dhe është kryer ekzaminimi nga njësia e forenzikës.
Prokuroria ka bërë të ditur se viktima është personi me inicialet E.Sh., ndërsa personi i lënduar po trajtohet në Qendrën Klinike Universitare të Kosovës (QKUK).
Lidhur me rastin janë intervistuar dëshmitarët okularë dhe i lënduari, ndërsa Prokuroria ka inicuar hetime për veprat penale “Shkaktimi i rrezikut të përgjithshëm” dhe “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.
Bazuar në dyshimet fillestare dhe provat e siguruara deri në këtë fazë të procedurës, me urdhër të Prokurorit të Shtetit janë ndaluar tre persona: A.Sh., nën dyshimin për veprën penale “Shkaktimi i rrezikut të përgjithshëm”, B.S., si person përgjegjës i kompanisë ndërtuese dhe E.E., si person i kompanisë investuese të projektit, nën dyshimin për veprën penale që lidhet me rrezikimin e sigurisë në vendin e punës.
Prokuroria ka njoftuar se brenda afatit ligjor do të shqyrtohet kërkesa për caktimin e masave të sigurisë ndaj të dyshuarve dhe do të vazhdojnë të gjitha veprimet hetimore për zbardhjen e plotë të rrethanave të këtij rasti.