Policia e Kosovës ka njoftuar se në komunën e Vushtrrisë, një të mituri i është konfiskuar një revole me pesë fishekë.
Në orët e mbrëmjes së datës 24 nëntor, në Stacionin Policor në Vushtrri, është raportuar për të shtëna me armë zjarri.
Pas kësaj, i dyshuari i moshës së mitur është arrestuar.
“Me të pranuar informacionin janë ndërmarrë veprime të shpejta policore, ku pas një kohe të shkurtër njësitet policore kanë identifikuar dhe arrestuar të dyshuarin, me ç’rast nga i dyshuari I. K., i moshës së mitur, është konfiskuar një armë e llojit pistoletë me pesë fishkë”, thuhet në njoftim.
Sipas hetimeve të policisë, bëhet e ditur se pas një mosmarrëveshjeje në mes të disa të rinjve, i dyshuari ka shtënë me armë në ajër.
“Nga hetimet fillestare bëhet e ditur se pas një mosmarrëveshje ndërmjet disa të rinjve i dyshuari I.K., ka shtënë me armë në ajër, ku në cilësi të provës materiale është konfiskuar edhe një gëzhojë që dyshohet të jetë shkrepur nga arma e konfiskuar nga i dyshuari”, thuhet në njoftim.
Në lidhje me këtë rast, policia ka njoftuar se në cilësi të të dyshuarit është arrestuar edhe një preson tjetër po ashtu i mitur, ku pas procedurave intervistuese, me urdhër të prokurorit të rastit, dy të dyshuarit janë liruar në procedurë të rregullt.
Ndaj tyre është iniciuar rast për veprën penale ’’Përdorim i armës’’ dhe ’’Armëmbajtje pa leje’’.