Skandali i deklaratës së ministres serbe për Administratë Publike dhe Vetëqeverisje Lokale, Snezhana Paunoviq, për “spastrimin etnik” të Kosovës bëri që e njëjta të shpallej “non grata” në Kosovë.
Por, deklarata që dje tronditi opinionin e gjerë për çka nxiti reagime edhe u dënua ashpër nga Bashkimi Evropian dhe politikanë shqiptarë e të huaj, njofton Dukagjini.
Megjithatë, polemikat nuk u ndalën vetëm te deklarata e ministres.
Po aq shqetësues ishte edhe mënyra se si moderatorja e emisionit, Jelena Pejoviq, e trajtoi Masakrën e Prekazit. Duke iu referuar një prej krimeve më të rënda të kryera gjatë luftës në Kosovë, ajo deklaroi se “policia serbe likuidoi” Adem Jasharin dhe familjen e tij, duke përdorur një terminologji që e paraqet masakrën si një operacion të zakonshëm policor dhe jo si një akt me pasoja tragjike ndaj civilëve.
“…nga ana tjetër, si pikë referimi merret edhe aksioni i policisë serbe në fshatin Prekaz i Poshtëm në vitin 1998, kur policia serbe likuidoi jo vetëm udhëheqësin e UÇK-së, Adem Jasharin, por edhe tërë familjen e tij, përfshirë të mitur dhe gra. Mbi 50 anëtarë të familjes Jashari humbën jetën”, thotë Pejoviq.
Përdorimi i fjalës “likuidoi” nuk është thjesht një zgjedhje gjuhësore pasi moderatorja zbut peshën e një ngjarjeje në të cilën u vranë mbi 50 anëtarë të familjes Jashari, përfshirë gra, fëmijë dhe të moshuar, duke krijuar përshtypjen e një veprimi legjitim policor e jo të një masakre që ka mbetur simbol i krimeve të luftës në Kosovë.
Edhe më kontradiktore është fakti se vetë moderatorja pranon se mes viktimave kishte të mitur dhe gra, por megjithatë zgjedh një gjuhë që shmang emërtimin e ngjarjes si masakër.
Një qasje e tillë ngre pikëpyetje serioze mbi etikën profesionale dhe përgjegjësinë mediatike. Kur një masakër ndaj civilëve përshkruhet me terma që relativizojnë dhunën dhe përgjegjësinë e autorëve, rrezikohet shtrembërimi i fakteve historike dhe normalizimi i narrativave që minimizojnë krimet e kryera gjatë luftës.
Masakra e Prekazit mbetet një nga ngjarjet më të rënda të luftës në Kosovë dhe simbol i rezistencës së familjes Jashari. Për këtë arsye, çdo përpjekje për ta zbutur ose relativizuar përmes terminologjisë natyrën e asaj që ndodhi nuk është vetëm e papranueshme nga pikëpamja profesionale, por rrezikon të kontribuojë edhe në shtrembërimin e kujtesës historike për një prej kapitujve më tragjikë të luftës në Kosovë.