Skuadra e Shkupit po qëndron në Antalya të Turqisë ku po vijon përgatitjet për pjesën e dytë të sezonit 2022/23.
Në një video të publikuar nga “Indeks TV”, shihet se si gjatë përgatitjeve fizike, me zë të madh dëgjohet kënga ‘Mora Fjalë’ që i kushtohet komandantit legjendar Adem Jashari, dhe futbollistët e kësaj skuadre njëzëri këndojnë tekstin rrëqethës.
Kjo vjen edhe si traditë nga tifogrupi i klubit, “Shvercerat”, që pothuajse në çdo ndeshje zgjedhin të këndojnë në kor me ‘Mora Fjalë’.
Kjo gjë ishte përjetuar edhe në stadiumin “Fadil Vokrri” në Prishtinë, në ndeshjen kualifikuese për grupet e UEFA Conference League, mes Ballkanit dhe FC Shkupit.
Shkupi aktualisht ndodhet në pozitën e dytë në renditjen tabelore me 34 pikë, tre pikë më pak se ekipi tjetër shqiptar Struga Trim&Lum, por këta të fundit kanë një ndeshje më shumë të zhvilluar.