Të enjten, në një pikë kontrolli në fshatin Banje të rajonit të Mitrovicës veriore, në një rrugë ilegale, njësiti i Policisë së Kosovës ka tentuar të ndalojë një veturë për kontroll rutinë gjatë kryerjes së detyrave dhe autorizimeve ligjore për garantimin e sigurisë.
Por, siç ka njoftuar policia rreth orës 19:00, personi i dyshuar (drejtuesi i automjetit) pasi ka vërejtur zyrtarët policorë të cilët e kanë sinjalizuar për ndalim, ka rritur shpejtësinë për të ikur nga ndalimi, duke rrezikuar drejtpërdrejt jetën e zyrtarëve policorë, përderisa njëri nga zyrtarët policorë me qëllim të shmangies së rrezikut të drejtpërdrejtë për jetën e tij dhe zyrtarëve tjerë policorë, është detyruar që të përdorë armën e zjarrit.
Ndërkaq, automjeti i dyshuar me shpejtësi është larguar nga vendi i ngjarjes përmes rrugëve ilegale, përderisa njësitet policore janë duke ndërmarrë veprime operative dhe hetimore për identifikimin dhe arrestimin e personit/ve të dyshuar të përfshirë në këtë rast.
“Si vazhdimësi e hetimit gjatë realizimit të detyrave policore, njësitet relevante policore kanë ndaluar dy automjete tjera, të cilat kanë ardhur në atë lokacio e që dyshohet se mund të ndërlidhen me veturën e dyshuar, në te cilat, vetura gjendeshin pesë persona, të cilët janë dërguar në stacion policor për intervistim dhe procedura të mëtejme në bashkëpunim dhe koordinim me organet e drejtësisë”, thuhet tutje në njoftimin e policisë.