Fillimisht Themelorja e rishtazi edhe Apeli ia bëri me dije Ekzekutivit se nuk mund të preken pagat e gjyqësorit.
Gjykata e Apelit ka vërtetuar vendimin e Gjykatës Themelore në Prishtinë me të cilin është anuluar si i kundërligjshëm vendimi Qeverisë që Kosovës për uljen e pagave të prokurorëve dhe gjyqtarëve.
Tash që dy shkallët e para i kanë dhënë të drejtë sistemit prokuroria dhe atij gjyqësor, qeveria nuk ka treguar nëse do ta përdorë mjetin e jashtëzakonshëm juridik.
Por pavarësisht nëse ky vendim do të kontestohet edhe në Supreme apo jo, Gëzim Shala nga IKD thotë se vendimi i Qeverisë nuk ka gjasë të marrë dritën e gjelbër pasi shkel Kushtetutën.
Hulumtuesi i lartë në IKD, Gëzim Shala ka thënë se “Në secilin rast aktgjykimi i shkallës së parë dhe i shkallës së dytë, kanë qenë mjaftueshëm të qartë dhe për më tepër edhe në mungesë të këtyre aktgjykimeve, çështja ka qenë shumë e qartë. Përpos ligjit edhe të gjitha standardet dhe praktikat ndërkombëtare theksojnë se është e domosdoshme për pavarësisë e gjyqësorit, stabiliteti i tyre financiar, dhe në këto rrethana definitivisht pagat e tyre nuk mund të preken”.
Konfirmimi nga ana e Apelit nuk e ka befasuar as avokatin Ylli Zekaj, që thotë se një vendim i tillë i Qeverisë nga fillimi ka qenë populist dhe formë hakmarrjeje për dështimin e jetësimit të vettingut.
Avokati, Ylli Zekaj ka theksuar se “Ka qenë një vendim i pritur në të cilën është konfirmuar ajo që kemi thënë edhe më herët , atë qe e ka thënë shoqëria civile, dhe të gjithë akterët të cilët e kanë përcjellë punën e sistemit gjyqësor dhe të qeverisë, që qeveria ka marr një vendim të kundërligjshëm, për uljen e pagave të gjyqtarëve dhe prokurorëve meqenëse nuk ka të drejtë, një mundësi e tillë është kur kemi restriksione ekonomike, humbje në buxhet, gjë që nuk e ka konfirmuar asnjëherë qeveria e Republikës së Kosovës.”
Në vendimin e Gjykatës thuhet se pagat e prokurorëve dhe gjyqtarëve garantohen me ligj dhe duhet të jenë në përpjesëtim me dinjitetin e profesionit të tyre dhe barrën e përgjegjësisë dhe se paga nuk mund të ulet përgjatë mandatit të tyre, përveç situatave të jashtëzakonshme të vështirësive ekonomike.