Nura ngushëllon familjet pas aksidentit në të cilin humbën jetën një grua dhe një fëmijë
Pas aksidentit tragjik në fshatin Gllobar të komunës së Drenasit, në të cilin dy persona kanë humbur jetën, kryetari i komunës së Skenderajt, Fadil Nura, teksa është shprehur i prekur nga rasti, ka ngushëlluar famijet për humbjen e tyre. Ai, përmes një postimi në llogarinë e tij në Facebook, ka bërë të ditur se dy […]
Pas aksidentit tragjik në fshatin Gllobar të komunës së Drenasit, në të cilin dy persona kanë humbur jetën, kryetari i komunës së Skenderajt, Fadil Nura, teksa është shprehur i prekur nga rasti, ka ngushëlluar famijet për humbjen e tyre.
Ai, përmes një postimi në llogarinë e tij në Facebook, ka bërë të ditur se dy viktimat, një grua dhe një fëmijë shtatëvjeçar janë nga komuna e Skenderajt.
“I prekur thellësisht në shpirt pas aksidentit të sotëm, ku humbëm dy qyterarë të komunës sonë, një nënë e dy fëmijëve dhe një 7-vjeçar. Në këto momente të rënda bashkëndjejmë dhimbjen me familjet, dhe lutemi për shërim të shpejtë të të lënduarve. Shpirti i tyre u prehtë në paqen e Zotit”, ka shkruar Nura.
Ndryshe, Policia e Kosovës e ka konfirmuar vdekjen e dy personave në fshatin Gllobar të komunës së Drenasit, si pasojë e një aksidenti trafiku.

Kështu ka bërë të ditur për RTV Dukagjini, zëdhënësi i policisë për rajonin e Prishtinës, Agron Borovci, i cili ka theksuar se në aksident janë përfshirë dy automjete, ku kanë mbetur të lënduar edhe tre persona të tjerë.
“Rreth orës 14:00, është pranuar informata për një aksident trafiku të ndodhur në fshatin Gllobar, të komunës së Drenasit. Nga informatat e para, bëhet e ditur se dy vetura janë përfshirë në aksident, dhe si pasojë e aksidentit dy persona kanë humbur jetën përderisa tre të tjerë kanë pësuar lëndime”.

Sipas Borovcit, trupat e pajetë të viktimave janë dërguar në Institutin e Mjekësisë Ligjore, ndërkaq të lënduarit janë dërguar në Qendrën Klinike Universitare të Kosovës, për trajtimin e nevojshëm mjekësor.
Ai ka theksuar se njësia rajonale e trafikut ka dalë në vendin e ngjarjes, dhe po ndërmerr veprimet e nevojshme për ndriçimin e shkaqeve, që kanë sjellë deri te aksidenti.
Policia konfirmon vdekjen e dy personave në aksidentin në Gllobar të Drenasit















