Një shpërthim i virusit Ebola në Republikën Demokratike të Kongos, që deri tani ka shkaktuar të paktën 131 viktima, mund të përhapet shumë më shpejt sesa ishte parashikuar fillimisht, kanë paralajmëruar zyrtarët e Organizatës Botërore të Shëndetësisë.
Përfaqësuesja e OBSH-së, Anne Ancia, deklaroi për BBC se hetimet e vazhdueshme po tregojnë se rastet e infektimit janë shtrirë edhe në zona të tjera të vendit.
Sipas autoriteteve, deri të martën janë regjistruar mbi 513 raste të dyshuara me Ebola në Kongo, ndërsa një viktimë është raportuar edhe në Ugandën fqinje.
Drejtori i përgjithshëm i OBSH-së, Tedros Adhanom Ghebreyesus, i cili javën e kaluar e shpalli situatën emergjencë ndërkombëtare shëndetësore, tha se është “thellësisht i shqetësuar” për ritmin dhe përmasat e përhapjes së epidemisë.
Ekspertët druhen se virusi mund të ketë qarkulluar për disa javë para se rasti i parë të identifikohej më 24 prill.
Aktualisht nuk ekziston një vaksinë për llojin e Ebolës që po shkakton këtë valë infeksionesh, por OBSH-ja po shqyrton mundësinë që trajtime dhe ilaçe të tjera të ofrojnë mbrojtje ndaj virusit.