Nënkryetari i Lidhjes Demokratike të Kosovës (LDK), Lutfi Haziri, ka deklaruar se partia e tij nuk do të bëjë mocion, por është e gatshme për zgjedhje kur të largohet kryeministri i Kosovës, Albin Kurti.
Kjo deklaratë e tij vjen pasi Kurti ka deklaruar se është i gatshëm të diskutojë me opozitën për të dërguar vendin në zgjedhje.
Në një konferencë për media sot, ai u shpreh i gatshëm për zgjedhje të reja, por tha se nuk do të japë dorëheqje për të mundësuar realizimin e kërkesës së opozitës por vetëm nëse ka shpërbërje të Kuvendit.
Sipas Hazirit, Kurti po viktimizohet me deklaratat e tij se është i gatshëm për zgjedhje të reja tashmë kur ka hyrë në vitin e katërt të mandatit.
“Siç ka deklaruar Kryetari i LDK-së mbrëmë, kryeministri Kurti është dorëzuar e po kërkon viktimizimin. LDK nuk bën mocion, por është e gatshme për zgjedhje kur vendi mbetet pa Kryeminister, dhe natyrisht për qeverisje. LDK nuk ia mundëson e as mundëson dëshirën për viktimizim. Veç dorëheqja pas dorëzimit! LDK është gati për të gjitha”, ka shkruar Haziri në Facebook.
Ndryshe, sot Kurti, ka thënë se është i gatshëm të shkojë në zgjedhje nëse opozita është e gatshme të ulet e të bisedojë për shpërndarjen e Kuvendit, duke theksuar se “nuk ka pse të rrëzohet qeveria”.
“Nëse opozita do zgjedhje, ne jemi të gatshëm ta shpërndajmë Kuvendin dhe të shkojmë në zgjedhje, nëse opozita do të kemi më pak muaj qeverisje, jemi të gatshëm të bëjmë shpërndarjen e Kuvendit, por jo ta rrëzojmë qeverinë”, ka deklaruar Kurti.
Ai ka deklaruar se nuk do të japë dorëheqje.