Ministri në detyrë i Mbrojtjes, Ejup Maqedonci, ka bërë të ditur se një grup oficerësh të Forcës së Sigurisë së Kosovës kanë diplomuar me sukses në Kursin e Lartë të Oficerit dhe Kursin e Komandës dhe Shtabit të Përgjithshëm, të zhvilluara në Komandën e Doktrinës dhe Stërvitjes të Forcave të Armatosura të Republikës së Shqipërisë.
Maqedoni thotë se përfundimi me sukses i këtyre programeve të avancuara të edukimit ushtarak forcon kapacitetet udhëheqëse dhe operacionale të FSK-së, duke dëshmuar përkushtimin për zhvillimin e një ushtrie moderne dhe profesionale, njofton Dukagjini.
Ai theksoi se ky sukses është njëkohësisht dëshmi e bashkëpunimit të ngushtë ndërmjet Republikës së Kosovës dhe Republikës së Shqipërisë në fushën e edukimit dhe aftësimit ushtarak.