Organizata Ndërkombëtare Detare (IMO), agjenci e Kombeve të Bashkuara, ka deklaruar se nuk ekziston bazë ligjore për bllokimin e Ngushticës së Hormuzit apo çdo ngushtice tjetër të përdorur për transport ndërkombëtar.
Sekretari i Përgjithshëm i IMO-së, Arsenio Dominguez, tha në një intervistë për BBC Radio 4 se asnjë shtet nuk ka të drejtë ligjore ndërkombëtare të ndërmarrë veprime për të bllokuar kalimin në rrugë detare ndërkombëtare.
Ai paralajmëroi se një veprim i tillë do të krijonte një precedent të rrezikshëm, duke theksuar se, pavarësisht konfliktit në rajon, e drejta ndërkombëtare nuk e lejon bllokimin e ngushticave strategjike.
Dominguez shtoi se përshkallëzimi i mëtejshëm i situatës po rrit shqetësimet për rreth 20 mijë detarë që ndodhen ende në Gjirin Persik, si dhe për ndikimin ekonomik global.
Sipas tij, sa më gjatë të zgjasë kriza, aq më të mëdha do të jenë pasojat për ekonominë botërore.