Qindra pacientë janë të bllokuar në spitalet në veri të Gazës dhe nuk janë fizikisht në gjendje të lëvizin në jug, ka thënë kreu i agjencisë së OKB-së për refugjatët palestinezë në territor.
Tom White nga UNRWA i bëri jehonë asaj që mjekët dhe organizatat e tjera bamirëse kanë thënë se është e pamundur të zhvendosen pacientët nga spitalet si Al-Quds në Gazën veriore.
Gjysmëhëna e Kuqe Palestineze thotë se Izraeli u tha atyre që të evakuonin spitalin të dielën, ndërsa sulmet vazhdojnë aty pranë.
“Shumë njerëz në veri po kërkojnë strehim në shkollat e UNRWA, ata po kërkojnë strehim në spitale”, ka thënë White.
Gjithashtu, ai tha se shumë njerëz në veri, jo vetëm pacientë “nuk mund të lëvizin sepse fizikisht nuk kanë transport, nuk kanë mjete”, shkruan BBC.
Njerëzit janë “shumë të uritur, shumë të etur dhe shumë të frikësuar”, dhe shumë po jetojnë me copa buke dhe “kur të mundemi, ne do t’u ofrojmë ushqim të konservuar”.