Shqyrtimi i dytë i Projektligjit për Masat e Përkohshme të Produkteve Themelore në Raste të Veçanta të Destabilizimit në Treg nuk ka marrë përkrahjen e opozitës në Kuvend.
Deputeti i Partisë Demokratike të Kosovës, Arben Mustafa, ka deklaruar se nuk mund t’i lejohet një partie të vetme “autoriteti” mbi përcaktimin e çmimeve.
Ndërkohë, deputetja e Lidhjes Demokratike të Kosovës, Janina Ymeri, ka thënë se partia e saj e përkrah projektligjin në parim, por jo mënyrën se si është ndërtuar ai.
Edhe shefi i Grupit Parlamentar të Aleancës për Ardhmërinë e Kosovës, Besnik Tahiri, tha se ligji krijon vetëm kushte formale për një bord, ndërsa vendimmarrja reale, sipas tij, mbetet te Qeveria dhe Ministria e Industrisë, Ndërmarrësisë dhe Tregtisë.
Ai ka theksuar se nëse Qeveria do të donte të intervenonte kundër rritjes së çmimeve, do ta ulte akcizën dhe TVSH-në.
“Ky ligj nuk është asgjë tjetër veçse krijon pesë vende kushte për atë bord, ndërsa e gjithë vendimmarrja është e koncentruar në Qeveri e MINT”, ka deklaruar Tahiri.