Partia Demokratike e Kosovës (PDK) dhe Aleanca për Ardhmërinë e Kosovës (AAK) kanë ngushëlluar familjarët dhe miqtë e Cenës. Atë e kanë vlerësuar si zërin intelektual dhe çlirimtar të Kosovës në ditët më të vështira.
Nga PDK theksojnë se figura intelektuale dhe emblematike e profesorit Cena, i cili ishte edhe luftëtar i UÇK-së, do të nderohet e kujtohet përherë me respektin më të madh.
“Me dhembje morëm lajmin për vdekjen e atdhetarit e profesorit të shquar, Sabahajdin Cena, i cili kontribuoi për vite me radhë edhe në Degën e PDK-së në Rahovec, prej themelimit duke qenë edhe kryetar i kësaj dege për një mandat.
Figura intelektuale dhe emblematike e profesorit Cena, i cili ishte edhe luftëtar i UÇK-së, do të nderohet e kujtohet përherë me respektin më të madh.
Ngushëllimet më të sinqerta për familjen, miqtë dhe bashkëpunëtorët e profesor Cenës!”, thuhet në telegramin e ngushëllimit.
Ndërkaq, kreu i AAK-së, Ramush Haradinaj tha se Cena me vargjet e poetëve shqiptarë u jepte zemër ushtarëve të UÇK-së, të etur për lirinë e vendit.
“Me pikëllim të thellë mora lajmin për vdekjen e intelektualit dhe atdhetarit të madh, Prof. Dr Sebahajdin Cena! Ai ishte zëri intelektual dhe çlirimtar i Kosovës në ditët më të vështira. Me vargjet e poetëve shqiptarë u jepte zemër ushtarëve të UÇK-së, të etur për lirinë e vendit”, ka shkruar Haradinaj.
Ndryshe, më 14 janar 2019, Cena kishte marrë ftesë nga Gjykata Speciale për t’u intervistuar lidhur me aktivitetin dhe angazhimin e tij në UÇK.
“Ne besojmë në pastërtinë e luftës tonë çlirimtare, dhe vlerat e saja nuk mund të kontestohen nga askush, nuk kemi asnjë arsye që t’u shmangemi organeve të drejtësisë dhe do të jemi në dispozicion të çfarëdo thirrjeje për ta zbardhur të vërtetën”, kishte thënë Cena.