Organizata Ndërkombëtare Detare (IMO) ka hedhur poshtë idenë e vendosjes së tarifave të detyrueshme për anijet që kalojnë nëpër Ngushticën e Hormuzit, duke theksuar se një masë e tillë nuk mbështetet nga e drejta ndërkombëtare.
Reagimi i agjencisë së specializuar të Kombeve të Bashkuara vjen pas deklaratave të presidentit amerikan Donald Trump, i cili ka sugjeruar vendosjen e një tarife prej 20 për qind për mallrat që transportohen përmes kësaj rruge strategjike detare.
Sipas IMO-së, kuadri aktual ligjor ndërkombëtar nuk lejon vendosjen e tarifave të detyrueshme të tranzitit në ngushticat që shërbejnë për lundrim ndërkombëtar. Organizata thekson se e drejta e kalimit të lirë dhe të papenguar është një nga parimet themelore të së drejtës detare ndërkombëtare.
Qëndrimi i IMO-së pritet të intensifikojë debatin mbi statusin juridik të Ngushticës së Hormuzit, një prej korridoreve më të rëndësishme energjetike në botë, përmes së cilës transportohet një pjesë e madhe e eksporteve globale të naftës dhe gazit natyror të lëngshëm. Çdo përpjekje për të ndryshuar rregullat e kalimit në këtë zonë mund të ketë pasoja të rëndësishme ekonomike dhe gjeopolitike, transmeton Dukagjini.