Më 16 maj të vitit 1999, shënohet dita kur është zhdukur profesori, politologu dhe luftëtari i paepur i çështjes kombëtare, Ukshin Hoti. Me rastin e përvjetorit të zhdukjes së tij, do të bëhen vizita në Shtëpinë – Muze të Ukshin Hotit, në Krushë të Madhe.
Në nderim të kësaj diten, liderët institucionalë kanë përkujtuar përvjetorin e zhdukjes së Ukshin Hotit.
Presidentja e Kosovës, Vjosa Osmani, ka përkujtuar intelektualin Ukshin Hoti, duke shkruajtur se janë 23 vjet pritje për njeriun që mendimin politik e sinkronizoi me aktivizmin politik për lirinë, republikën dhe demokracinë.
“Ai i qëndroi besnik idesë së Republikës, e liria do të ketë kuptim vetëm kur fati i tij dhe i të zhdukurve me dhunë të tjerë, të zbardhet krahas me vendosjen e drejtësisë”, thuhet në përkujtimin e presidentes Osmani.
Ndërsa, kryetari i Kuvendit të Kosovës, Glauk Konjufca, ka vizituar sot (e hënë) familjen e veprimtarit Ukshin Hoti në Krushë të Madhe.
Konjufca, ka deklaruar se ka qenë një krim i madh dhe i rëndë të cilin ‘nuk e ka përjetuar vetëm familja, por mbarë populli’, duke shtuar se Hoti ishte njëri ndër veprimtarët më të shquar të kombit tonë.
“Veprimtaria e tij është shumë e gjatë, e vlefshme dhe e rëndësishme për ta kujtuar. Ai na ka lënë një trashëgimi të jashtëzakonshme intelektuale, patriotike dhe kombëtare të cilën gjithmonë do ta studiojnë brezat e tashmë dhe të ardhshëm”, ka thënë Konjufca.
Kryeparlamentari, po ashtu ka theksuar se veprat e Ukshin Hotit edhe sot e kësaj dite, na ndriçojnë rrugën tonë përpara, dhe se Hoti ka qenë një personalitet që nuk ka kalkuluar në pozita e favore, por gjithmonë ka qenë përkrah popullit.
Gjithashtu, ai ka shtuar se shteti i Serbisë nuk ka dhënë asnjë përgjegje në lidhje me këtë rast, edhe pse dihen autoritetet e burgut në ditën e zhdukjes, askush nuk është gjykuar apo dënuar.
“Kjo tregon se ky shtet nuk po ëndërron drejtimin të cilin e ka pasur në vitin 1998-1999 kundër popullit shqiptar”, u shpreh Konjufca.
Ndërkaq, Komuna e Rahovecit ka njoftuar se me rastin e 23-vjetorit të zhdukjes së profesorit, Ukshin Hoti, do të bëhet një vizitë, sot (e hënë) nga ora 11:00 në Shtëpinë – Muze të Ukshin Hotit, në Krushë të Madhe.
Komuna në këtë vizitë, ka ftuar veprimtarët e çështjes kombëtare, përfaqësuesit e pushtetit lokal e qendror.
Më 16 maj të vitit 1999 në rrethana ende të pandriçuara është zhdukur Ukshin Hoti.
Veprimtari i mirënjohur i Lëvizjes Kombëtare, profesori Ukshin Hoti u lind më 17 qershor 1943 në Krushë të Madhe të Rahovecit. Ishte profesor, shkrimtar, filozof, intelektual, atdhetar dhe veprimtar i shquar i çështjes kombëtare gjatë viteve 1981-1999.
Ukshin Hoti ka qenë edhe ligjërues në disa universitete të Amerikës, ku kishte studiuar dhe diplomuar.
Për aktivitetin e tij atdhetar ishte arrestuar disa herë nga regjimi serb i Titos dhe i Milosheviqit.
Për herë të fundit ishte arrestuar në vitin 1994 nga policia serbe, me akuzën e ushtrimit të veprimtarisë armiqësore kundra Jugosllavisë, dhe për pjesëmarrjen e tij në lëvizjen për Republikën e Kosovës, me ç’ rast ishte dënuar me 5 vjet burg.
Më 16 maj të vitit 1999, pas lirimit dhe pas daljes nga qelia e burgut të Dubravës, zhduket nga polica serbe pa lënë gjurmë.
Shokët e burgut, ata që kanë shpëtuar nga masakra e Dubravës, disa ditë më vonë, kanë treguar se Ukshini ishte liruar nga burgu më 16 maj, ditën e diel, ditë që nuk praktikohej lirimi i të burgosurve.
Që nga ajo kohë e deri tani, veprimtari i madh i çështjes kombëtare shqiptare, magjistri, filozofi, shkrimtari, publicisti, atdhetari i përkushtuar, Ukshin Hoti, konsiderohet ende i zhdukur.