Ministri i Jashtëm i Maqedonisë së Veriut, Bujar Osmani ka biseduar me ministrin e Jashtëm të Serbisë Ivica Daçiq lidhur me trupave ushtarake serbe përgjatë kufirit Kosovë – Serbi.
Osmani ka thënë se mirëpret deklaratën për tërhjeqje tê trupave si hapi i parë drejt de-përshkallëzimit.
Ministri i Jashtëm i Maqedonisë së Veriut ka përshëndetur vendimin e NATO-s për trupa shtesë të KFOR-it.
“OSBE e pranishme dhe e gatshme për të ndihmuar në uljen e tensioneve dhe inkurajimin e procesit diplomatik!”, ka shkruar Osmani.
Serbia ka vendosur trupa ushtarake në kufi me Kosovën.
Për këtë, koordinatori për komunikime strategjike në Këshillin e Sigurisë Kombëtare të SHBA-së, John Kirby, shprehu shqetësimin e Uashingtonit, për siç tha, “dislokimin e madh” të trupave të Serbisë përgjatë kufirit me Kosovën.
“Ne do të monitorojmë dislokimin e madh serb përgjatë kufirit me Kosovën. Ne i bëjmë thirrje Serbisë të tërheqë forcat nga kufiri dhe të vazhdojë të ulë tensionet”, tha Kirby gjatë një bisede me gazetarë më 29 shtator.
Lexo dhe: ShBA i kërkon Serbisë të tërheqë trupat ushtarake nga kufiri me Kosovën
Ai tha se gjatë bisedës që sekretari amerikan i Shtetit, Antony Blinken, zhvilloi më herët gjatë ditës me presidentin serb, Aleksandar Vuçiq, ka kërkuar që Serbia të ulë tensionet.
Kirby tha se incidentet e dhunshme, sikurse ai i majit ndaj pjesëtarëve të KFOR-it, por edhe ai në Banjskë, paraqesin rrezik jo vetëm për personelin e sigurisë së Kosovës, por edhe të NATO-s.