Presidentja e Kosovës, Vjosa Osmani, ka falënderuar Shtetet e Bashkuara të Amerikës (ShBA) për lirimin e tre policëve të kidnapuar nga forcat serbe.
“Dua ta falënderoj ShBA-në për lirimin e tre policëve kosovarë që u kidnapuan nga Serbia”, ka thënë Osmani.
Ajo këtë deklaratë e ka bërë në një konferencë të përbashkët me guvernatoren e shtetit të Iowas, Kim Reynolds.
Në këtë konferencë Kosova dhe Iowa kanë nënshkruar marrëveshjen e marrëdhënies së shteteve simotra dhe bashkëpunimit ndërmjet dy shteteve.
Ndryshe, tre zyrtarët policorë të Kosovës, të kidnapuar nga forcat serbe më 14 qershor, u liruan të hënën e 26 qershorit.
Shtetet e Bashkuara, Gjermania dhe Mbretëria e Bashkuar i kanë bërë thirrje vazhdimisht Serbisë që t’i lirojë pa kushte policët.