Presidentja e Kosovës, Vjosa Osmani, ka falënderuar qytetarët për pjesëmarrjen dhe mbështetjen në zgjedhje, duke shprehur mirënjohje për votuesit e LDK-së dhe të gjithë qytetarët e vendit.
Në një deklaratë publikuar në Facebook, Osmani ka thënë se gjatë fushatës është takuar me mijëra qytetarë në gjithë Kosovën, ku ka dëgjuar shqetësimet dhe shpresat e tyre për një të ardhme më të mirë për vendin.
Osmani ka shtuar se ky rezultat nuk përbën fundin e një gare, por vazhdim të një misioni për t’i shërbyer Kosovës dhe për të ndihmuar në krijimin e institucioneve të reja.
Ajo ka theksuar gjithashtu se nuk do të jetë pengesë në formimin e institucioneve, duke shtuar se do të kontribuojë në tejkalimin e krizës politike dhe forcimin e shtetit dhe aleancave të Kosovës.
“Në këto zgjedhje kam marrë pjesë me qëllim që të ndihmoj në ringritjen e LDK-së dhe për t’i dhënë vendit mundësi te riktheje balansat demokratike e të krijojë institucionet sa më parë. Në këtë drejtim, e ritheksoj atë që e kam thënë disa herë: emri im as nuk ka qenë, as nuk është e as nuk do të bëhet pengesë në krijimin e institucioneve. Përkundrazi, i gjithë kontributi im do të jetë i fokusuar vetëm në daljen nga kriza dhe ndërtimin e institucioneve të cilat mbrojnë shtetin, demokracine, kushtetutën dhe aleancat”.
Ajo ka falënderuar të rinjtë, gratë, mërgatën dhe të gjithë qytetarët që morën pjesë në votime, duke theksuar se besimi i tyre është forcë për demokracinë.