Mbreti Charles është diagnostikuar me një formë kanceri, ka njoftuar pallati mbretëror Buckingham.
Lloji i kancerit nuk është zbuluar, por, sipas një deklarate të pallatit, mbreti filloi “trajtimet e rregullta”.
Lidhur me këtë ka reaguar presidentja e Kosovës, Vjosa Osmani, e cila ka shkruar në X se populli i Kosovës i bashkohet me shpresë dhe solidaritet, duke i uruar madhërisë së tij shërim të shpejtë dhe të plotë.
“….Populli i Kosovës u bashkohet me shpresë dhe solidaritet, duke i uruar Madhërisë së Tij shërim të shpejtë dhe të plotë”, shkruan presidentja.
We extend our deepest sympathies to HM King Charles III, the Royal Family, and the people of the United Kingdom in light of the King's recent diagnosis.
The people of Kosovo join you in hope and solidarity, wishing His Majesty a rapid and full recovery. https://t.co/zgPgw6SnLt
— Vjosa Osmani (@VjosaOsmaniPRKS) February 5, 2024
Ndryshe, mbreti i Mbretërisë së Bashkuar, Charles III, ka marrë diagnozën e një forme të kancerit dhe ka filluar trajtimin, ka bërë të ditur Pallati Bakingam të hënën.
Në më pak se 18 muaj të mbretërisë së tij, mbreti Charles do të ndërpresë detyrat publike, por do të vazhdojë të përfshihet në çështje shtetërore, duke mbajtur rolin kushtetues si kreu i shtetit.
Pallati njoftoi se diagnoza e kancerit nuk lidhet me trajtimin e mëparshëm për problemet me prostatën që mbreti ka pësuar. Nuk u specifikua lloji i kancerit që preku mbretin 75-vjeçar.
Gjatë trajtimit për prostatën, është vërejtur një çështje tjetër shqetësuese, dhe testet diagnostikuese identifikuan kancerin.
“Testet diagnostikuese kanë identifikuar një formë të kancerit”, ka njoftuar pallati.
Mjekët kanë rekomanduar që mbreti Charles të shtyjë detyrat e tij publike, por Pallati theksoi se ai është pozitiv lidhur me trajtimin dhe shpreson që të rikthehet në detyrat publike sa më shpejt që të jetë e mundur.
Charles u shpall mbret në shtator të vitit 2022, pas vdekjes së nënës së tij, mbretëreshës Elizabeth II. Lajmi për diagnozën e tij vjen në kohën kur nusja e djalit të tij, princesha e Uellsit, po rikuperohet pas një ndërhyrjeje kirurgjikale në stomak.
Liderët politikë në Mbretërinë e Bashkuar kanë dërguar mesazhe mbështetëse për mbretin Charles.
Princ Harry ka konfirmuar vizitën e tij në Londër për të parë babanë e tij, duke rritur shpresat për një pajtim brenda familjes mbretërore, duke përfshirë marrëdhëniet e trazuara me Mbretin Charles dhe Princin William.
Gruaja e tij Meghan do të qëndrojë në Shtetet e Bashkuara me dy fëmijët e çiftit – princin Archie dhe princeshën Lilibet.