Nënkryetari i BDI-së, Bujar Osmani, ka reaguar ashpër ndaj ligjit të propozuar për përfaqësim të drejtë, duke e krahasuar atë me një ligj të miratuar nga Kuvendi i Republikës Socialiste të Serbisë në vitin 1990, i cili, sipas tij, shërbeu si bazë për largimin e shqiptarëve nga institucionet publike në Kosovë.

“Më 26 korrik 1990, Kuvendi i Republikës Socialiste të Serbisë miratoi ‘Ligjin për Marrëdhëniet e Punës në Rrethana të Veçanta’, të botuar në Gazetën Zyrtare të RS të Serbisë nr. 40/90”, shkruan Osmani.

Sipas tij, ky ligj krijoi bazën ligjore për largimin masiv të shqiptarëve nga administrata, arsimi, shëndetësia, drejtësia dhe institucionet publike në Kosovë.

Osmani e lidh këtë precedent historik me ligjin e propozuar për përfaqësim të drejtë në vend, duke argumentuar se edhe ky i fundit vendos “etikën para etnikes”.

“Është një ide mbi të cilën është ndërtuar e gjithë doktrina e tij: sikur përkatësia etnike të ishte pengesë për meritën dhe sikur mbrojtja e përfaqësimit të shqiptarëve të ishte në kundërshtim me profesionalizmin”, shprehet Osmani.

Ai kritikon gjithashtu mungesën, sipas tij, të mekanizmave detyrues dhe sanksioneve në ligjin e propozuar.

“Ndryshe nga Balancuesi, nuk ekziston asnjë detyrim ligjor që institucionet ta respektojnë përfaqësimin e drejtë dhe adekuat”, pretendon Osmani.

Në fund, Osmani e cilëson ligjin si të papranueshëm dhe kërkon që ai të mos miratohet.

“Prandaj ky ligj është as më pak e as më shumë si ligji serb i ’90-ave në Kosovë dhe si i tillë lirisht mund të quhet TRADHËTI. Prandaj NUK GUXON të kalojë”, ka shkruar Osmani.