Presidentja e Kosovës, Vjosa Osmani është shprehur se Forca e Sigurisë së Kosovës(FSK) është ndërtuar “mbi sakrificën e brezave të tërë, në kërkim të paqes, lirisë dhe drejtësisë”.
“Dita e ushtrisë sonë i paraprinë festës së 28 Nëntorit, daljes së parë të UÇK-së dhe ditëlindjes së komandantit të UÇK-së, Adem Jashari”, ka shkruar Osmani.
Tutje presidentja Osmani është shprehur se “Liria dhe Ushtria jonë, janë meritë edhe e këtyre ngjarjeve historike”.
Osmani i ka nderuar të arriturat e ushtrisë së Kosovës, “e cila është kontribuese aktive e paqes dhe sigurisë në Kosovë dhe më gjerë, përkrah partnerëve tanë në NATO”.
Presidentja Osmani ka potencuar se ishte një moment i vërtetë krenarie shënimi i Ditës së Forcës bashkë me gratë dhe burrat tanë në uniformë.
Ndërsa ministri i Mbrojtjes, Armend Mehaj me rastin e 27 nëntorit, “Ditës së Forcës”, ka thënë se ëndrra jonë po jetësohet çdo ditë përmes djemve dhe vajzave të ushtrisë tonë të cilët me krenari po mbajnë uniformën.
“Ëndrrën tonë shekullore po e jetësojmë çdo ditë, përmes ushtrisë sonë kapacitetet e të cilës po ngriten në vazhdimësi, përmes vajzave dhe djemve tanë që me fisnikëri, krenari e vullnet të hekurt bartin uniformën, emblema e së cilës do të thotë shumë për ne”.
“Shqiponja e flamurit do të thotë historia e kombit, e përbashkëta që përtej kufijve bashkon idealet, rrënjët tona që nuk ndryshohen dhe as shkëputen ndonjëherë”, ka shkruar Mehaj.
Ndërsa ka shtuar se synimet e tyre janë të bashkëveprojmë me familjen evropiane dhe në NATO, për paqe dhe liri universale të njerëzimit.