Presidentja e Republikës së Kosovës, Vjosa Osmani, të mërkurën e 3 gushtit ka pritur në takim ambasadorin e Gjermanisë, Jörn Rohde.

Në takim është diskutuar për situatën e përgjithshme në vend dhe rajon.

E para e vendit, ka theksuar se në raport me zhvillimet e fundit në veri të Kosovës, institucionet e Kosovës janë të përkushtuara ta vazhdojnë koordinimin e plotë me partnerët ndërkombëtarë, ashtu siç janë koordinuar edhe deri më tani.

Sipas Osmanit, Kosova është gjithnjë e gatshme që të ndërmarrë hapa, të cilët kontribuojnë për paqen dhe stabilitetin e vendit dhe rajonit.

Poashtu, Presidentja Osmani ka potencuar se është më rëndësi t’i dërgohen mesazhe të qarta Serbisë nga komuniteti ndërkombëtar se nuk do të tolerohet retorika e saj nxitëse dhe veprimet e saj të dhunshme nëpërmjet strukturave ilegale në veri të Kosovës.

Në këtë takim është diskutuar edhe për kandidaturën e Kosovës për anëtarësim në Këshillin e Evropës si dhe për rëndësinë e përmylljes sa më parë të procesit për liberalizim të vizave për qytetarët e Kosovës.