Kandidatja për presidente nga LDK-ja, Vjosa Osmani, gjatë “tubimit të bashkimit” të kësaj partie, ka deklaruar se Lidhja Demokratike e Kosovës e ka të vërtetën në anën e saj, derisa ka akuzuar partinë në pushtet për propagandë.
Osmani tha se përkushtimi i LDK-së nuk do të ndalet, pasi sipas saj, faktet dhe e vërteta janë në anën e tyre.
“Ky përkushtim nuk do të ndalet sado që dikush mund ta dëshirojë një gjë të tillë, sepse faktet janë të forta dhe janë në anën tonë. E vërteta është në anën tonë, ne kemi veç të vërtetën, ata kanë veç propagandën”, u shpreh ajo.
Ajo kritikoi edhe ata që, sipas saj, e konsiderojnë veten të pazëvendësueshëm duke mbajtur qytetarët “peng të frikës dhe viktimë të linçimeve”.
Ajo shtoi se ka nga ata që “nuk mund ta ngrenë flamurin as në forumet e brendshme e lëre më në forumet ndërkombëtare”.
“Ka nga ata që e quajnë veten të pazëvendësueshëm pikërisht duke e mbajtur qytetarin peng të frikës e viktimë të linçimeve. Kush do e kishte imagjinuar që 27 vjet pas luftës, dikush do të konsideronte kësi pengesë veç pse i janë hapur dyert Kosovës, pengesë veç pse flamuri i Kosovës nisi të ngrihej nëpër forume botërore, pengesë nga ata që nuk mund ta ngrenë flamurin as në forumet e brendshme e lëre më në forumet ndërkombëtare”, u shpreh ish-presidentja.