Pas vizitave që pati jashtë vendit, presidentja e Kosovës, Vjosa Osmani, është kthyer në vend me bindjen se Kosova është në rrugën e drejtë.
Kështu ka thënë ajo në një postim në llogarinë e saj në Facebook.
“Pas një jave përplot takime e diskutime me miq e aleatë të rinj e të vjetër, kthehemi në vendlindje me bindjen e plotë se Kosova është në rrugë të drejtë”, shkroi presidentja.
Në kuadër të vizitës së saj në Shtetet e Bashkuara të Amerikës, presidentja Osmani është takuar me presidentin e SHBA-së, Joe Biden.
Osmani e ka publikuar një foto ku shihet bashkë me presidentin Biden.
Ajo nuk ka dhënë detaje të tjera, por vetëm ka shkruar “miqësi e përhershme dhe partneritet i palëkundur me SHBA-në”.
Po ashtu, gjatë vizitës së saj në ShBA, presidentja Osmani është takuar edhe me sekretarin e Përgjithshëm të NATO-s, Jens Stoltenberg.
Osmani ka theksuar se qëllimi strategjik i Kosovës mbetet anëtarësimi në komunitetin euroatlantik.
Sipas saj, këtij hapi duhet t’i paraprijë përfshirja e Kosovës në Partneritetin për Paqe.
“Osmani në takim me shefin e NATO-s, tha se anëtarësimi në Bashkimin Evropian dhe NATO do të kontribuojë në rritjen e sigurisë dhe stabilitetit në rajon dhe e cilësoi anëtarësimin në këtë organizatë, prioritet shtetëror të Kosovës, si një parakusht për sigurimin e paqes në rajon, ashtu edhe për promovimin dhe mbrojtjen e vlerave të përbashkëta”, thuhet në njoftimin e zyrës së presidentes.
Në këtë kontekst, Osmani ka përmendur faktin se Forca e Sigurisë së Kosovës, e cila po zhvillohet në përputhje me standardet e NATO-s, do t’ia mundësojë Kosovës një rol aktiv në kuadër të sigurisë rajonale dhe globale.
Po ashtu, ajo ka potencuar se Kosova është mirënjohëse për mbështetjen e vazhdueshme të NATO-s në ruajtjen e stabilitetit dhe paqes.
Sa i përket agresionit të Rusisë në Ukrainë, Osmani ka thënë se Kosova ka dënuar luftën e paprovokuar të Putinit kundër Ukrainës dhe se është plotësisht në linjë me sanksionet e BE-së dhe SHBA-së kundër Rusisë.